Zogfahrt en Riobamba ond de grossi Samschtigmaert

Am Friitig semmer am morge frueh ( am foifi) ufgstande und haend eus ufe waeg zom bahnhof gmacht. vo det us hemmer metem bus ( weder mol) ca zwoi stond muesse fahre uf Alausi.

Det acho esch sgrosse gstoerm losgange. mer hend muesse astoh foerd zogbillet. send aber leider ned di einzige gsii...fasch am schauter acho het eus de buschauffeur gholt und de haemmer met em met muesse, es heigi ke billet meh foer hoet aber er hegi no 5 foere spoeteri zogfahrt. weder emou es affegloeck gha...:)

Nach langem warte semmer de ufs dach vo dem Zog ufgstege. Es esch mega aeng gsii. Zogfahrt esch es einmaligs erlaebnis gsii, de zog esch mega schnaell de baerg abe gfahre ond mer hend en super schoeni ussecht gha uf di omlegende baerge. De Zog het hoet nome no ei einzige Wage, fruehner heter mehreri waege gha..leider duends do en Suedamerika emmer meh, oder fasch nome no, met de bues reise. Esch eigentli schad..

Swarte het sech weder emou glohnt..;)

Em heigoh semmer emene Bus ghocket wo eigentli 40 Setzplaetz gha haett aber secher oeppe 60 luet denne gsii send..ond gschmoeckt hets ou raecht starch...

Am obe semmer ene gueti Pizzeria goge znacht aesse. esch rechtig fein gsii..Mer hend daenkt mer choente jo weder emou es haubeli wii trenke, ond de hemmer uf de charte de wii "Caliente" gseh..Toent ned schlaecht oder?
Womerne de hend welle ischaenke hemmer gmerkt dass das chruegli ganz heiss esch..Mer hend fasch noeme choenne vor lache, womer de gmerkt hend dass uf spanisch "caliente" = "heiss" heisst. Jo ond so hemmer es haubeli heisse wii muesse trenke..esch ned sooooo fein gsii aber defoer ou igfahre..;)

Am samschtig haemmer weder emou usgschlofe.

Am morge semmer denn a grossi Samschtigmaert. Wow di velle luet. da esch de en maert do, ned eso we zriinech oder zchoom. Mer hend ame fasch noeme gwoesst wo aene leuge oder lose..do chasch aues choufe, vo bruuchte schueh oeber bruchti Outopneu ( Continental, gaeu Rolf? jetzt woesse mer wodr di bruchte pneu heschecke ;))

ond lebaendegi huehner, kaninchen, jongi hoend ( foer 8.-) jongi chaetzli, vell verschednigs gemuese, natel, stereoalage, waerchzueg usw....

Womer de nochli wiiter gloffe send semmer ed fleischabteilig choo...di duend en ganzi sou broetle ond nochaene chasch saege wasd wotsch ond de houesis grad ab..hende am stand hets luet gha wos ame grad gaesse hend.. en guete! mer hend emu nachaene ke honger meh gha..

Amene "stand" hend froue s'getreide grad a ort ond stell gmahle..esch no interessant zom gseh we da so zue ond haer goht do..de hesch grad choenne s'froesch gmahlne mehl metneh.

mer hend de no 4 Banane kouft, da het eus grad emou 0.30 fr koschtet. schnaeppli..;)

Eusi Woesch haemmer ene Woescherei brocht. di waesche der alles, glettes ond legges sogar no zaeme. foer 6 kg woesch hemmer 1.80 zahlt. Ond si schmoekt wonderbar..

Mer woensche euch es wonderschoens Wocheaend, foer eus gots morn wiiter nach Guaranda ond de nach Guayaquil. da send oeppe 6 stond busfahre..Jupiii

Hasta luego

adios