en wonderschoene ond onvergaessleche tag bide wale...

Hallo zaeme..

zersch emou es riese merci foer di vele gloeckwoensch zom geburi..ha riese freud gha a euchne mail, facebook itraeg, blog itraeg, telefon ond sms. merci tusig mou.

nach guet 17 stonde busfahre semmer jz scho zpatagonie onde achoo. am busbahnhof haemmer de euses hostel buechet ond grad no en tour zode wale. uf da het jo s'stibeli scho lang lang gwartet ond de esches ploetzli sowiit gsii. am samschtig haemmer choenne ufene tagesusflog. d'stibe het de am morge am vieri gmeint mer hege verschlofe..;) smile..ond nochaene esch si eifach au stond go luege wa foer ziit das esch. am viertu ab sebni am morge esch eus de es mini buessli choge abhole. nachdem mer alli andere luet bi erne hotel abgholt hend hets aentli choenne losgoh. guet en stond vo puerto madryn entfaernt esch de nationalpark peninsula valdes. leider esch am morge de hafe no gschlosse gsii ond mer hend stagesprogramm muesse aendere. eigentlech waere mer grad am morge ufs boot foers wale watching aber es het no zfescht gwendet ond so semmer zersch zode pinguine, seeloeie ond see-elefante. di cheibe send mega deck gsii..hihi..mer haend natuerli emmer chli angscht gha dass de hafe doch ned ufgoht ond mer ned zode wale choene. da waer jo de waeutondergang gsii..aber nochem zmettag womer de aui pingus usw betrachtet hend haemmer eus ufe waeg gmacht zom hafe. da esch ou weder ca ei stond gange metem outo. de park esch naemli no gross. e dem "dorf" acho wo di wale-watching toure starte, (das "dorf" het genau oeppe drue strosse, aber es esch eifach voller toureschte) haemmer de no en haub stond muesse warte bis mer hend choenne ufs boot. da esch gloub di laengschti haub stond gsii womer scho je gwartet hend. :)

Denn aentlech haemmer choenne ufs boot. laeck di luet uf dem boot. waend die woerkli aui zode wale? es send ca 60 luet uf dem boot gsii. mer hend zerscht choenne druf ond somet haemmer eus en guete platz ade front choenne ergattere. wow. so ufgregt semmer gloub scho lang noemmer gsii. chum semmer abgfahre hemmer vo wiitem scho de erschti gseh usem wasser puschte. mer send de metem boot chli noecher goge guegsle ond de haemmer gwartet. ploetzli escher denn usem wasser cho. wow. di send meeega gross. so ca 25 meter. eifach riesig ond ou breit. nachem erschte "schock" hemmers de eifach gnosse. dwale choeme mega noech as boot, si send so neugierig. maengisch send si sogar onderem boot dore ond weder uecho uf desere siite. mer chas woerkli fasch ned gloube wenn mer da gseht. es esch wonderschoen das tier zbeobachte. leider hemmer ke orca gseh, di choeme ebe ersch spoeter aber di andere send ou cool. si hend em momaent babys. aber di babys send ou so riesig ond dorom haend mer ame ned gwoesst oeb mer jz es baby gseh hend oder ned. ;) es esch es riesigs erlaebnis ond mer muess sech maengisch fasch chli sougewasser verdroecke.

mer send guet einehaub stond ufem boot gsii, aber eus esche svorcho we wen mer nor dhelfti so lang ufem meer gsii send. es esch leider so schnaell verbii. aber mer send nochaene ou zemli erschoepft gsii ond mued. bem zroggfahre hemmer grad no en groppe gseh wo mega omeplantschet hend. es send drue wale gsii. si hend sech em wasser omegwaelz ond gsproetzt ond send di ganz ziit om euses boot gschwomme. mer hend afe noemme gwoesst wo luege. da esch en sehr en schoene abschloss gsii.

de

ganzi tag esch vell zschnaell verbii aber mer hends esoo gnosse ond send am obe oebergloeckli gsii. mer hends am afang gar noni rechtig realisiert dass mer wale e freiheit hend doeffe beobachte..esch no es komisches gfuehl..

zom kroenende abschloss vo dem tag semmer no fein goge aesse. mhhh..lomo hemmer gha..da esch mega guets fleisch ond mer send scho baud soechtig..da esch so cheibe guet..;)
s'aesse do en argentinie esch sowiso grandios. mer choent sech glatt e da land verliebe.
es gfallt eus do mega dluet send ou mega naett, dnatur esch eifach de hammer ond dhostel suuber.

mer hend bis jetzt uf eusere reis nome gueti erfahrige gmacht. ossert dass si ede stibe zbuenos aires ide u-bahn s'portemonaie gstohle hend metem bankchaertli ond auem gaeud denne. aber jae no. mer hend scho ganz anderi gschechtli ghoert vo anderne reisende, de esch da grad no harmlos.

jetzt goht eusi reis nome no 17 taeg ond de semmer scho weder deheime. laeck bobi da esch de schnaeu gange. e dene 17 taeg haemmer aber no vell vor. ;)
hoet zobe fahre mer uf bariloche. da send ou weder ca 17 stond vo do entfaernt. det waemer eventuell no goge river rafte ond det hets no so schoeni see womer waend goge aluege. nochaene goemmer no uf mendoza, da esch weder chli em norde obe. det haemmer eigentli no welle goge skiifahre aber es het leider scho noemme so vell schnee. naja. aber det gets feini schoggi ond vorallem feine wii. det chamer so wii-toure mache. ;) da esch secher oeppis foer eus. hehe. jo ond de goemmer velech no goge riite dete. sell no schoen sii. de kev het zwar chli schess dasem nochaene aues weh duet..;) mol luege. jo ond vo dete goemmer de weder uf buenos aires zrogg. det waemmer de no ane tschuttimatch ond gogene tango-show luege. ond denn esch wahrschindli eusi reis oeppe zaend. schniiifff..
aso es esch ned eso dass mer eus ned woerde freue foer hei, mer freue eus scho ou afe riesig foer hei, aber so reise esch haut scho ou mega cool. vorauem jetzt womer eus scho chli a aues gwoehnt hend ond womer woesste we aues funktioniert..

mer gniesse jetzt eusi reis no e volle zoeg ond freue eus uf euch..geili schwiiz..

bis gli gli

stibii ond kevi usem schoene argentinie!