es paar taeg in bariloche, its like switzerland

hola chicos
como va?
mer send nachere 17 stoendige busfahrt vo de wale in bariloche acho..
ond do esches eifach de hammer.. andersch geil..
aber jetzt schoen de reihe no..
mer send weder mol ohni plan am busbahnhof acho in bariloche. guet womer de s gepaeck gholt haend, send scho die erschte choge ehres hostel apriese.. mer haend mol alli informatione ufgnoh.. ond de be einere gseit mer choeime i das hostel..
esch es belligs gsi ond s taxi hend si ou no grad
zahlt ond z morge ond z nachtesse esch enbegreffe im pries ond de wen mer 3 naecht bliibe esch die vierti no gratis.. ok.. haemmer daenkt ond send emol goge luege oeb de das ou alles stemmt..
ond siehe da.. de am empfang het s gliche verzellt. jupii ond de send zemmer ersch no schoen ond suuber.. tipp topp.
guet de haemmer mol alli aktivitaete wo si abiete dore gluegt ond oeis entschede, das mer goehnd goge canopy mache ond goge rafte..
auso semmer am zieschtig am morge goge canopy mache.. was esch das? waerde sech secher einigi froge.. schnaell verzellt du duesisch vo boum zo boum.. amene gstaelltli faetzisch em seil entlang zom noechschte boum.. esch auso arsch geil gsi.. so en rechtige adrenalin kick.. die laengschti distanz esch 200 meter gsi..ond d fahrt het so ca 8 sekonde duret..
leider choene mer kei foeteli inedueh.. mer haned weder mol es super internet cafi gfonde wo de usb be allne compis ned fonktioniert..sorry
am nomitag semmer chli am see ghaenget ond chli am kaeffele gsii.. es esch do wie em belderbuech, schoeni blauii see ond schneebedeckti baerge em hentergrond eifach wonderschoen.. aber ebe waege de belder hani jo scho erklaert..
am mettwoch haemmer zerscht woelle goge skifahre.. doch die wo met eus em zemmer gsi send haend gseit es lohni sech ned woerkli.. es esch do end of saison ond de schnee esch nass ond schwaer ond es seige nor no 3 piste offe.. ond skibillet esch ebe ou no zemli tuer ..
so semmer am mettwoch met em bus ergend wohe gfahre.. es esch emu am see gsi ond 25 kilometer vo oeisem dorf entfernt.. mer send de chli am see no glofe ond haend eifach s wonderschoene waetter gnosse, es esch so en rechtige fruehligstag gsi.. so wie be oeis ame..
mer send de 8 kilometer glofe ond de haemer pick nicket ond send no metemene 2-er sesselilift ufene baerg jo ehner hoegu ufe.. esch sone langsame gsi wie em hasliberg vom bidmi ed kaeserstatt ue.. vo det obe het mer en wonderschoene usbleck gah uf velli see ond baerge.. wonderschoen..det haemer de es bierli zwitscheret ond chli gsoennelet ond eifach de tag gnosse..
am obe haemer weder em hostel gaesse ond det aesse alli wo det schlofe ond so haemer weder vell luet kenneglehrt ond das esch ame no spannend..
ond de esch aentli donnschtig worde ond oeise rafting tag het agfange, natuerli wie so oft met ere halbstond verspoetig..
of jede fall semmer de a dem floss acho ond es esch de erschti taeg gsi wo si weder rafting abote haend.. jujuju
nach em omzieh ond vellne instruktione semmer de aentli ufe floss.. jepa..
am afang escher noni so schnaell gsi ond de haemmer alli komandos chli guebt ond teschtet.. ond zwoesche dore ou nochli d landschaft gnosse..
ond de esch de scho gli die erschti stromschnaelle (rapido) cho..


de guide het voraene nomol die letschte awiesige geh ond gseit es choeni emmer passiere das s boot kippi.." jojo" haemmer alli daenkt aber ned oeises.. ond de haemer vol padlet was das zeugs haelt.. de semmer aber ergendwie schraeg uf d waelle zuecho.. shit.. de esch alles so schnaell gange, de esch de kevi ergendwie oeber d stibe igfloge ond s ganze boot hets kehrt.. scheisse.. d stibe ond de kevi send am afang no onderem boot uecho... weder abetouchet ond de semmer aentli em freie gsii.. aber emmer no em riessende wasser.. ond das wasser esch arschzapfechaut gsii.. brrrrr... womer de aentli weder loft gha haend ond chli d oebersecht..semmer auso mega froh gsii.. de guide het de mol s boot kehrt ond de die erscht uezoge.. de kevi esch emu de 2ti gsi ufe boot ond het de emmer es oug ufd stibe gha.. aber die esch eifach wiiter s loch abe duesset .. doch mer haned no sone saivtycar be oeis gha, de esch em kanu gsi ond het oeis die ganzi tour begleitet.. ond de ergendeinisch het er de mol d stibe ufgfange ond weder is boot zrogg brocht..aber noni e oeises sondern es andere... mer send drom met 2 boot onderwaegs gsi..
doch ende gut alles gut esch de ou d stibe weder e oeisem boot gsii.. jupiii..
de semmer zerscht mol alli chli gschocket ond froh gsi weder em boot z hocke.. es esch de wieter gange, es send em ganze 10 so rapidos gsi.. ond oeis hets bem erschte scho oeberstellt.. oje
aber das het oeises team zaemegschweisset. ond die andere rapidos haemmer alli oeberlaebt ohni usezgheihe.. ond so semmer zom abschloss nomol alli es wasser gompet.. schlaechti idee gsi, woell s wasser esch noni waermer worde.. aber es esch absolut geil gsi... so semmer de grad a de grenze zu chile usem floss gstege.. de semer zrog is camp gfahre ond haend es hammer geils barbeque oebercho..
es esch eifach en arsch geile tag gsi..
womer de weder en bariloche acho send ond em hotel gsi send semmer todmued gsi..
uf jede fall haemmer die nacht guet gschlofe..
jetzt gohts hoet wieter uf mendoza, send weder 17 stond met em bus.. juhui..
aber det gehts so super wii, of das freue mer oeis..
hasta luego amigos..
kev ond stibe